Sadiq Khan, borgarstjóri Lundúna, segir alla Evrópumenn sem búi í Lundúnum „mjög velkomna“ í borginni.
„Sem borg erum við þakklát fyrir ykkar gríðarlega framlag og það mun ekki breytast í ljósi þessarar atkvæðagreiðslu,“ skrifaði Khan á Facebook-síðu sína í dag og vísaði í niðurstöður þjóðaratkvæðagreiðslu Breta þar sem ákveðið var að ganga úr sambandinu.
„Það er tæplega ein milljón evrópskra ríkisborgara sem búa í Lundúnum í dag og þeir auðga borgina okkar gríðarlega, vinna, borga skatta, vinna í almannaþjónustu og leggja sitt af mörkum til menningar- og borgarlífsins,“ skrifaði Khan.
Þá bætti hann við að nú væri það ábyrgð allra að bæta upp þá skiptingu sem var í aðdraganda kosninganna og „einbeita okkur að því sem sameinar okkur í stað þess sem sundrar okkur.“