Alexander Svíaprins, sonur Karls Filippus prins og Sofiu prinsessu, var skírður við hátíðlega athöfn í konunglegu kapellunni í Drottningholm í hádeginu í dag. Prinsinn, sem er fimm mánaða gamall, var hins vegar nefndur strax við fæðingu. Snáðinn heitir fullu nafni Alexander Erik Hubertus Bertil og er hann hertoginn af Södermanland.
Sofia prinsessa, móðir Alexanders, hélt á honum undir skírn. Skondin uppákoma átti sér stað í athöfninni þegar Karl Gústav Svíkonungur festi orðu á skírnarkjól Alexanders. Hann tók síðan í höndina á snáða sem neitaði að sleppa hönd afa síns, sem gantaðist með því að hrista hönd barnabarnsins hressilega. Allt kom fyrir ekki, Alexander vildi ekki sleppa afa sínum.
Myndband af uppákomunni má sjá í heild sinni á vef SVT með því að smella hér.