Jórdanskur rithöfundur, sem var ákærður fyrir að misbjóða íslam eftir að hann deildi skopmynd á Facebook-síðu sinni, hefur verið myrtur.
Nahid Hattar, sem er kristinn, var skotinn þremur skotum fyrir utan dómstólinn í höfuðborginni Amman, þar sem réttarhöldin yir honum fóru fram.
Morðingi Hattar hefur verið handtekinn og málið er í rannsókn.
Rithöfundurinn var handtekinn í ágúst fyrir að hafa móðgað guð. Honum var haldið í 15 daga.
Skopmyndin sem hann deildi sýnir skeggjaðan mann liggja reykjandi í rúminu ásamt tveimur konum og biðja guð um drykk.
Á samfélagsmiðlum var Hattar gagnrýndur fyrir að vera á móti íslam. Hann sagðist hins vegar ekki hafa ætlað að særa nokkurn, hann hefði aðeins viljað draga fram þá ímynd sem öfgamenn hefðu af himnaríki.
Yfirvöld voru hins vegar á því að deiling skopmyndarinnar á Facebook væri glæpur.