Erlent | AFP | 4.2.2017 | 15:24 | Uppfært 23:00

„Svokallaður“ dómari með fáránlega skoðun

Fjölmenn mótmæli fóru fram við bandaríska sendiráðið í London í dag. Þúsundir tóku þátt. AFP

Donald Trump Bandaríkjaforseti hefur heitið því að fá lögbanni, sem sett var á umdeilt ferðabann hans í gær, hnekkt. Ferðabannið nær til ríkisborgara sjö landa þar sem meirihluti íbúanna eru múslimar.

Úrskurður alríkisdómarans, James Robart, í borginni Seattle gildir á landsvísu en hann féll í kjölfar kæru frá ríkissaksóknara Washington-ríkis, Bobs Ferguson. Lögbannið gildir á meðan kæra Fergusons verður tekin til skoðunar.

Í dag ákvað utanríkisráðuneytið að afturkalla ferðabannið að hluta vegna niðurstöðu dómarans. Það þýðir að vegabréfsáritanir um 60 þúsund manna, sem höfðu verið afturkallaðar, hafa aftur tekið gildi.

Frétt mbl.is: Lögbann á ferðabann Trumps

Trump hefur í dag kallað Robart „svokallaðan dómara“ sem hafi „fáránlegar“ skoðanir sem miði að því að taka vald frá Bandaríkjunum.

Robart komst að því að ferðabann Trumps gengi gegn stjórnarskrá landsins. Í kjölfarið hafa nokkur flugfélög sagt að þau ætli að leyfa ríkisborgurum landanna sjö að fljúga með þeim til Bandaríkjanna.

Orðrétt skrifaði Trump á Twitter eftir að dómurinn féll: „Skoðun þessa svokallaða dómara, sem í rauninni tekur valdið frá landi okkar, er fáránleg og verður hnekkt!“

The opinion of this so-called judge, which essentially takes law-enforcement away from our country, is ridiculous and will be overturned!
— Donald J. Trump (@realDonaldTrump) February 4, 2017

„Þegar land getur ekki lengur ákveðið hver má koma og hver má fara, sérstaklega þegar um öryggissjónarmið er að ræða – þá er vandinn stór!“ skrifaði Trump í næstu færslu.

Ríkisstjórn Trumps heldur því fram að tilskipunin um ferðabannið, sem gefin var út í síðustu viku, hafi verið nauðsynleg til að vernda borgara Bandaríkjanna.

Bannið var sett á skyndilega. Það olli öngþveiti á flugvöllum og setti strik í reikninginn hjá mörgum sem voru á ferðalagi, m.a. þeim sem voru með græna kortið (landvistarleyfi) í Bandaríkjunum. Vísindasamfélagið hefur einnig miklar áhyggjur þar sem vísindamenn heimsins vinna þvert á landamæri við rannsóknir sína. Ferðafrelsi margra þeirra hefur nú verið skert.

Frétt BBC.