Ríkisstjórn Donalds Trump hefur hert viðmið sem auðvelda yfirvöldum að vísa ólöglegum innflytjendum úr landi og flýta brottvísun þeirra. BBC greinir frá.
Í yfirlýsingu frá heimavarnarráðuneytinu kemur fram að nýju viðmiðin kveða á um að einstaklingur muni þurfa að geta sýnt fram á að hann hafi verið í Bandaríkjunum samfleytt í tvö ár. Ef það tekst ekki munu stjórnvöld nýta sér þær heimildir til að vísa einstaklingnum úr landi. Hins vegar verður hætt að láta ólöglega innflytjendur lausa á landamærunum en þeim verður komið fyrir í gæslu á meðan mál þeirra eru skoðuð.
Ólöglegir innflytjendur sem hafa verið handteknir fyrir umferðarlagabrot eða þjófnað munu verða undir smásjá reglnanna auk þeirra sem hafa verið dæmdir fyrir alvarlegri glæpi í Bandaríkjunum.
Sean Spice, fjölmiðlafulltrúi Hvíta hússins, segir að þessar nýju áherslur muni ekki hafa áhrif á að fólk verði flutt umvörpum á brott úr landinu heldur víkkar þetta út þær heimildir sem þegar eru fyrir hendi.
Talið er að um 11 milljónir ólöglegra innflytjenda séu í Bandaríkjunum.