Starfsmennirnir tveir frá endurskoðunarfyrirtækinu PricewaterhouseCoopers (PwC) sem áttu þátt í því að röng kvikmynd var kynnt sem besta kvikmyndin á Óskarverðlaunahátíðinni um síðustu helgi hafa nú fengið lífverði sér til aðstoðar.
Fréttavefur BBC segir starfsmennina hafa fengið líflátshótanir á samfélagsmiðlum. Talsmaður PwC staðfestir að gripið hafi verið til þess ráðs að auka öryggi við heimili þeirra Brian Cullinans og Mörthu Ruiz í kjölfar þess að fjölmiðlar birtu upplýsingar um hvar þau búa og myndir af fjölskyldum þeirra.
Vefurinn TMZ.com, sem segir fréttir af fræga fólkinu, segir þau Cullinan og Ruiz óttast um líf sitt, en að mistökin muni ekki kosta þau endurskoðunarstarfið hjá PwC.
Þau Cullinan og Martha Ruiz, báru ábyrgð á því að afhenda þeim Warren Beatty og Faye Dunaway, kynnum verðlaunaafhendingarinnar, umslögin með vinningshöfunum. Cullinan afhenti Beatty rangt umslag með þeim afleiðingum að Beatty tilkynnti að kvikmyndin La La Land hefði borið sigur úr býtum, en síðan var það leiðrétt þar sem rétti sigurvegarinn var myndin Moonlight.
Atvikið þykir eitt mesta glapparskot sem orðið hefur í sögu Óskarverðlaunanna. PwC hefur séð um að telja atkvæði við Óskarsverðlaunaafhendinguna með góðum árangri í 83 ár. Ekki liggur enn fyrir hvort fyrirtækið verði fengið til verksins að ári.