Skotar munu ganga aftur til atkvæðagreiðslu um sjálfstæði landsins, að sögn Nicolu Sturgeon, fyrsta ráðherra Skotlands. Sturgeon skaut föstum skotum á Theresu May, forsætisráðherra Bretlands, á fjöldafundi Skoska þjóðarflokksins og sagði íhaldsmenn óttast mjög niðurstöður annarrar þjóðaratkvæðagreiðslu.
Sturgeon sagði að vilji skoska þingsins yrði að verða ofan á en hún mun krefjast þess að efnt verði til atkvæðagreiðslunnar áður en Bretland gengur úr Evrópusambandinu.
„Eftir að skilmálar Brexit liggja fyrir en á meðan það er enn mögulegt að breyta um stefnu munu íbúar Skotlands hafa val,“ sagði Sturgeon á fundinum í Aberdeen. „Það verður atkvæðagreiðsla um sjálfstæði,“ sagði hún við mikinn fögnuð.
„Það á ekki að draga Skota úr Evrópu af íhaldsstjórn sem stefnir staðráðin á hörmulegt hart Brexit. Þau horfa nú skelfingu lostin fram á niðurstöðu skosku þjóðarinnar.“
Sturgeon kom breskum stjórnvöldum á óvart á mánudag þegar hún krafðist þjóðaratkvæðagreiðslu í síðasta lagi snemma árs 2019. May svaraði því til að nú væri ekki tíminn og sagði að öll orka ætti að fara í að landa góðu samkomulagi um Brexit fyrir Bretland í heild.
Fyrsti ráðherrann mun á miðvikudag fara þess á leit við skoska þingið að það veiti sér heimild til að biðja bresku ríkisstjórnina um vilyrði fyrir öðrum kosningum. Skoski þjóðarflokkurinn situr í minnihlutastjórn á skoska þinginu en Græningjar hafa heitið stuðningi í málinu, sem dugir til.