Taílenska lögreglan handtók karlmann fyrir að reyna að smygla sex glösum af sæði til Laos. Yfirvöld fundi geymi með köfnunarefni í tösku mannsins þegar hann var á leið yfir landamæri Taílands og Laos. Í geyminum var síðan að finna sex glös með mannlegu sæði.
BBC hefur eftir taílensku lögreglunni að maðurinn hafi játað að hann hafi verið flytja sæðið til frjósemisklíníkur í Vientiane, höfuðborgar Laos.
Staðgöngumæðrun í ábataskyni er vaxandi iðja í Laos, eftir að nágrannaríkin Taíland og Kambódía bönnuðu þessa iðju.
Að sögn lögreglunnar var sæðið úr kínverskum og víetnömskum karlmönnum.
Smyglarinn, sem er taílenskur, sagðist hafa farið tólf ferðir á síðasta ári þar sem hann sótti sæði í frjósemisklíníkur í Bangkok og flutti það til klíníkurinnar í Laos að því er dagblaðið Bangkok Post greindi frá.
Maðurinn sagðist einnig hafa farið með nokkrar sendingar á sjúkrahús í Kambódíu.
Taílensk yfirvöld bönnuðu árið 2015 útlendingum að greiða taílenskum konum fyrir að þjónustu þeirra sem staðgöngumæður, en slík viðskipti voru áður vinsæl.
Kambódía fylgi síðan í kjölfarið ári síðar með sambærilegu banni.