Tíu manns, þar af maður sem er grunaður um vopnasölu, eru í haldi í tengslum við rannsókn á árás á matvöruverslun gyðinga í París árið 2015.
Claude Hermant, sem bíður annarra réttarhalda í tengslum við ólöglega vopnasölu, var handtekinn á mánudag ásamt öðrum og samkvæmt heimildum AFP-fréttastofunnar er jafnvel talið að fleiri verði handteknir.
Rannsóknin beinist meðal annars að því hvernig vígamaðurinn, Amedy Coulibaly, varð sér úti um vopnin sem notuð voru í árásinni 9. janúar 2015.
Coulibaly myrti fjóra eftir að hafa tekið starfsmenn og viðskiptavini í versluninni í gíslingu. Hann var skotinn til bana af sérsveitarmönnum sem réðust inn í húsið nokkrum klukkustundum eftir að Coulibaly réðst þar inn.
Kvöldið áður hafði Coulibaly skotið lögreglukonu til bana í úthverfi Parísar, Montrouge, og telja yfirvöld að hann hafi í upphafi ætlað sér að ráðast til atlögu í skóla gyðinga þar skammt frá.
Árásin í verslun gyðinga var einn hluti af þriggja daga hryðjuverkaógn í frönsku höfuðborginni. Hryllingurinn hófst með árás á ritstjórn Charlie Hebdo-ádeiluritsins þar sem tólf létust.
Vitað er að vopnin komu frá Slóvakíu og þaðan fóru þau til milligöngumanns í Belgíu áður en þau voru seld til fyrirtækis í eigu unnustu Hermants.
Hermant, sem saksóknari segir að hafi tengsl við öfgahægrihópa í Norður-Frakklandi, og unnusta hans voru yfirheyrð í desember 2015 vegna árásarinnar í verslun gyðinga en ekki ákærð.
Við yfirheyrslur neitaði Hermant að hafa komið að sölu vopnanna og að hafa vitað af undirbúningi árásarinnar.
Samkvæmt frétt Telegraph frá því í desember 2015 var Hermant lífvörður hjá Front National áður en hann tengdist öfgahópum til hægri, Bloc Indentitaire. Hann var áður fallhlífahermaður, málaliði og félagi í Département Protection et Sécurité, innan Front National, segir í frétt Telegraph frá þessum tíma. Málið þótti hið vandræðalegasta fyrir lögregluna þar sem Hermant hefur sagt að hann hafi verið heimildarmaður lögreglunnar varðandi ýmis mál gegn því að hún sæi í gegnum fingur sér með vopnasölu hans.