Herskip sökk í Svartahafi

Rússneskt herskip lenti í árekstri við flutningaskip á Svartahafi í dag og sökk í kjölfarið. Tyrkneska strandgæslan segir að tekist hafi að bjarga allri áhöfninni.

Í frétt AFP-fréttastofunnar er haft eftir rússneska varnarmálaráðuneytinu að áhöfn herskipsins hafi reynt að koma í veg fyrir að skipið myndi sökkva. Nú er ljóst að það tókst ekki.

Í frétt BBC fyrr í dag kom fram að milli 45-78 hermönnum hefði verið bjargað frá borði en að um fimmtán væri mögulega saknað. Nú herma fréttir AFP-fréttastofunnar að skipið sé sokkið en að tekist hafi að bjarga allri áhöfninni.

Áreksturinn varð í nágrenni Kumkoy, skammt frá Istanbúl. Flutningaskipið var að flytja dýr. Enn er ekki ljóst hvað olli árekstrinum og fréttir af vettvangi eru almennt enn mjög óljósar. 

Fréttin hefur verið uppfærð.

• Blogga um frétt