Hvarf fjárhundsins Blake og lambsins Bellu hefur vakið töluverða athygli í Bretlandi, en um er að ræða bestu vini sem hafa verið óaðskiljanleg síðan þau hittust fyrst.
Blake og Bella hurfu frá heimili sínu í Notthinghamskíri fyrir þremur vikum, en nú er Blake kominn í leitirnar, án Bellu sinnar. Eigandi dýranna, Natalie Haywood, segir Blake vel á sig kominn og að hann láti eins og ekkert hafi í skorist. Haywood saknar hins vegar enn þá Bellu, en er sannfærð um að Blake muni aðstoða við leitina að henni. BBC greinir frá.
Þúsundir hafa skráð sig í Facebook-hóp sem heldur utan um leitina og sjónvarpsmaðurinn Philip Schofield hefur boðið 1.000 pund í fundarlaun. Átta öryggismyndavélar voru settar upp til að reyna að hafa upp á vinunum og leitarhundar hafa lagt sitt af mörkum. Þá hefur leitin fengið sitt eigið myllumerki: #findblakeandbella. Því verður þó væntanlega breytt núna í #findbella.
Bella var aðeins fimm vikna þegar Haywood tók hana að sér. Blake tók strax ástfóstri við litla lambið og fljótlega voru þau farin að fylgja hvort öðru hvert fótspor.