Einn hryðjuverkamannanna þriggja sem óku á óbreytta borgara við Lundúnabrúna á laugardagskvöld með þeim afleiðingum að sjö létu lífið og hátt í 50 slösuðust kom fyrir sjónir í heimildarmyndinni „The Jihadis Next Door“ sem var sýnd á Channel 4 í fyrra.
Myndin fjallar um breska öfgamenn. Bætist hann í hóp hryðjuverkamanna sem hafa verið á lista bresku lögreglunnar en náð að láta til skarar skríða.
Mark Rowley, yfirmaður hryðjuverkalögreglu Bretlands, segir að á hverjum tíma séu 500 virkar rannsóknir í gangi vegna hryðjuverkaógnar þar sem um þrjú þúsund manns eru til rannsóknar. Breska lögreglan hefur komið í veg fyrir 18 árásir síðan 2013, þar af fimm frá árásinni á Westminster-brúnni fyrir tveimur mánuðum. Á undanförnum árum hafa alls verið í kringum 20 þúsund manns til rannsóknar hjá lögreglu.