Mikill viðbúnaður er í Lundúnum þar sem breska lögreglan hefur nýlokið stýrðri sprengingu við byggingu sem ætlað er að hýsa nýtt sendiráð Bandaríkjanna þar í borg. Hafði hún verið kölluð á vettvang vegna tilkynningar um tvær mannlausar bifreiðar við bygginguna.
„Stýrð sprenging var gerð um klukkan 17.37,“ segir í tilkynningu frá lögreglunni. Kemur þar einnig fram að svæðið umhverfis hafi verið girt af og að slökkvi- og sjúkralið sé á staðnum.
Uppfært:
Lögreglan hefur nú tilkynnt að störfum á vettvangi sé lokið og að málið sé ekki tengt hryðjuverkunum sem framin voru í borginni á laugardag.