Grænlenska lögreglan hefur sent frá sér viðvörun um að önnur flóðbylgjan gæti skollið á sama svæði og önnur bylgja kom á land í gærkvöldi. Borist hafi fregnir að öðru berghlaupi skammt austur frá Nuugaatsiaq.
Eru íbúar sem búa í fjörðunum í og við Uumannaq, m.a. í Illorsuit, hvattir til að leita hærra upp og halda sig fjarri strandlengjunni. Rýming er hafin í Illorsuit. Þetta kemur fram á vef grænlenska ríkisútvarpsins.
Fjögurra er enn saknað eftir að flóðbylgjan skall á þorpinu og hreif með sér ellefu hús seint í gærkvöldi. Ekki liggur fyrir hvort jarðskjálfti sem varð, sem mældist fjórir að stærð, eða berghlaup úr nálægu fjalli, sé ástæða þess að flóðbylgjan fór af stað. Rannsóknastofnun jarðfræði Danmerkur og Grænlands (GEUS) rannsakar það nú.
Jón Viðar Sigurðsson jarðfræðingur sagði í samtali við mbl.is í dag, að skjálftinn hefði átt upptök einhverja 30 kílómetra norðan við þorpið og ekki væri komið á hreint hvort að þetta hefði verið jarðskjálfti eða hvort að þetta væri berghlaup sem hefði fallið niður í sjó. Þetta tvennt komi til greina.
Hann sagði að það hefði nokkrum sinnum gerst á Grænlandi að berghlaup hefði fallið úr bröttum hlíðum og niður til sjávar og þannig valdið flóðbylgjum.