Bandaríkin munu beita herafli sínu gegn Norður-Kóreu ef nauðsyn ber til, þetta sagði Nikki Haley, fastafulltrúi Bandaríkjanna hjá Sameinuðu þjóðunum, í kjölfar tilraunar Norður-Kóreu með langdræga eldflaug á þriðjudag.
Öryggisráð Sameinuðu þjóðanna fundaði um eldflaugatilraun Norður-Kóreu í gær og hefur BBC eftir Haley að ný samþykkt verði dregin upp gegn stjórnvöldum í Pyonyang. Sagði hún eldflaugarskotið vera til vitnis um hraða þróun í vopnavæðingu Norður-Kóreu.
Stjórnvöld í Pyongyang hafa hins vegar sagst ófús til samninga, nema Bandaríkin bindi endi á „fjandsamlega stefnu“ sína gegn Norður-Kóreu.
Bandaríkin og Suður-Kórea hafa í dag staðið fyrir umfangsmiklum flugskeytaæfingum í Suður-Kóreu, annan daginn í röð.
Undanfarna mánuði hafa yfirvöld í Pyongyang ítrekað gert kjarnorku- og eldflaugatilraunir í trássi við bann Sameinuðu þjóðanna, sem hefur aukið spennuna á Kóreuskaga.
Haley sagði þó til greina koma að beita Norður-Kóreu viðskiptaþvingunum og tók Angela Merkel Þýskalandskanslari í sama streng. Áður hafði Donald Trump Bandaríkjaforseti gagnrýnt Kínverja á samskiptamiðlinum Twitter fyrir viðskiptasamband þeirra við Norður-Kóreu.