Að minnsta kosti 300 þúsund manns hafa sýkst af kóleru á síðustu 10 vikum í Jemen. Daglega greinast um sjö þúsund ný tilfelli. Ástandið er sagt óviðráðanlegt. Þetta staðfestir alþjóðadeild Rauða krossins. BBC greinir frá.
Yfir 1.700 manns hafa látist af völdum kóleru, samkvæmt upplýsingum frá Sameinuðu þjóðunum. Heilbrigðiskerfið, hreinlætisaðstaða og hreint vatn er af skornum skammti og hefur verið síðustu tvö ár eftir borgarstyrjöld í landinu.
Kólera er skæð bakteríusýking sem smitast mjög auðveldlega, m.a. með mat og vatni. Einfalt er að meðhöndla sjúkdóminn en í landi eins og Jemen, þar sem heilbrigðiskerfið er í molum, er erfitt og oft ómögulegt að fá lyf og lækningu.