Fílar og tígrisdýr drepa einn á dag

Fílar og tígrisdýr í útrýmingarhættu eru talin drepa að minnsta kosti eina manneskju á dag í Indlandi vegna vaxandi ágangs mannfólksins á búsvæði þeirra, samkvæmt nýjum tölum sem yfirvöld þar í landi hafa gefið út. Mannfólkið drepur hins vegar líka fjölda þessara dýra, aðallega til að hagnast á líkamspörtum þeirra, eins og tanna og felds. The Telegraph greinir frá.

Samkvæmt tölunum drápu dýrin 1.144 manns í árásum frá því í apríl 2014 þangað til í maí á þessu ári. Fílarnir eru taldir bera ábyrgð á 1.052 dauðsföllum en tígrisdýrin 92. Á sama tíma voru 345 tígrisdýr á drepin og 84 fílar, aðallega af veiðiþjófum.

Mikið skóglendi hefur horfið á Indlandi síðustu áratugi vegna fólksfjölgunar og þéttbýlisþróunar, en það hefur þvingað dýrin af sínum hefðbundnu búsvæðum inn í byggð.

Siddhanta Das, aðstoðarmaður umhverfisráðherra, fullyrðir að ágangi mannfólksins sé um að kenna, en verið er að undirbúa herferð til að vekja athygli á vandamálinu og vonandi draga úr fjölda dauðsfalla.

• 1 blogg um fréttina

Bloggað um fréttina

• Ásgrímur Hartmannsson: Indverjar nota fíla eins og traktora