Varnarmálaráðherra Bandaríkjanna, James Mattis, varaði við því í dag að ef Norður-Kórea réðist á bandarískt landssvæði gæti það áður en varði leitt til þess að styrjöld brytist út. Ummælin fólu í sér hvatningu til þess að draga úr spennu í samskiptum ríkjanna samkvæmt frétt AFP. Rex Tillerson, utanríkisráðherra Bandaríkjanna, hefur að sama skapi kallað eftir því.
Stjórnvöld í Norður-Kóreu hótuðu því í síðustu viku að að skjóta fjórum eldflaugum í tilraunaskyni að eyjunni Guam sem er bandarískt landssvæði. Bandarísk herstöð er einnig á eyjunni. Donald Trump, forseti Bandaríkjanna, hefur í kjölfarið farið hörðum orðum um ráðamenn í Norður-Kóreu en ummæli Matis og Tillersons eru mjög af öðrum toga.
Ráðherrarnir tveir skrifuðu sameiginlega grein um stöðu mála sem birtist í bandaríska viðskiptablaðið Wall Street Journal þar sem kemur fram að Bandaríkin hafi engan áhuga á því að koma núverandi ráðamönnum frá völdum í Norður-Kóreu eða að stuðla að sameiningu Norður- og Suður-Kóreu. Mikilvægt væri að leysa deiluna á diplómatískum forsendum.
Mattis sagði við blaðamenn í dag að ráðherrarnir hefði ákveðið að rita greinina fyrir tveimur vikum og að hún væri ekki svar við vaxandi spennu undanfarna daga. Hugmyndin hafi aðallega verið að sýna fram á að ráðuneytin tvö ynnu saman að lausn málsins. Leysa þyrfti málið friðsamlega með aðstoð Kína þó mögulegur hernaður væri áfram á borðinu.
Hvöttu þeir Mattis og Tillerson ráðamenn í Kína til þess að beita áhrifum sínum í Norður-Kóreu til þess að stuðla að friðsamlegum samskiptum, en Kína er bæði langstærsta viðskiptaland Norður-Kóreu og bandamaður landsins. Bentu ráðherrarnir á að Kína hefði mikla hagsmuni af því að tryggja frið og stöðugleika á svæðinu.