Ráðamenn í Norður-Kóreu segjast ætla að svara hertum viðskiptaþvingunum í sinn garð með því að setja enn meiri kraft í vopnaframleiðslu sína. Segjast þeir með því vera að bregðast við hættunni á innrás frá Bandaríkjunum að því er Reuters fréttastofan greinir frá.
Norður-Kórea sprengdi vetnissprengju neðanjarðar fyrr í þessum mánuði og hefur sú aðgerð verið gagnrýnd harðlega af alþjóðasamfélaginu.
Öryggisráðs Sameinuðu þjóðanna samþykktu einróma á fundi sínum á mánudag hertar viðskiptaþvinganir í garð Norður-Kóreu. Donald Trump Bandaríkjaforseti sagði þær þó bara lítið skref á þeirri leið að ná böndum yfir vopnakapphlaup landsins.
Utanríkisráðuneyti Norður-Kóreu sagði ályktunina vera brot á lögmætum rétti ríkisins til að verja eigin landamæri og að þeim væri ætlað að „kæfa fullkomlega ríkið og íbúa þess með allsherjar viðskiptahindrunum“.