Öryggisráð Sameinuðu þjóðanna mun koma saman til fundar á föstudag. Fyrr í kvöld kölluðu átta ríki eftir því að boðað verði til neyðarfundar í ráðinu. Fulltrúi Japana, sem gegnir formennsku í ráðinu, hefur ákveðið að kalla ráðið saman.
Á fundinum verður brugðist við ákvörðun Donalds Trumps, Bandaríkjaforseta, um að viðurkenna Jerúsalem sem höfuðborg Ísraels. Óttast er að ákvörðunin leiði til aukins ofbeldis í Mið-Austurlöndum en bæði Ísraelar og Palestínumenn gera tilkall til borgarinnar.
Frétt mbl.is: Segir Jerúsalem höfuðborg Ísraels
Bólivía, Egyptaland, Frakkland, Ítalía, Senegal, Svíþjóð, Bretland og Úrúgvæ eru ríkin átta sem krefjast að ráðið komi saman. Alls eiga 15 ríki sæti í ráðinu.
Framkvæmdastjóri Sameinuðu þjóðanna, António Guterres, hefur lagt áherslu á að staða Jerúsalems verði aðeins ákvörðuð í viðræðum á milli Ísraela og Palestínumanna.
Frétt mbl.is: Segja „hlið helvítis“ hafa opnast
Fulltrúi Bólivíu í ráðinu, Sacha Sergio Llorenty Soliz, segir ákvörðun Trumps vera gálausa og hættulega og segir hana ganga gegn alþjóðalögum. „Þetta er ekki einungis ógn við friðarviðræðurnar, þetta er einnig ógn við alþjóðaöryggi og frið,“ segir Soliz.