Alríkisstofnun upplýsingaöryggis Þýskalands (BSI) heldur uppi vörnum eftir að í ljós kom að starfsmenn stofnunarinnar vissu af stórum gagnaleka í margar vikur án þess að láta lögregluyfirvöld vita. Forstjóri BSI segir að stofnunin hafi ekki áttað sig á umfangi lekans fyrr en á fimmtudag.
Stofnunin hefur fengið á sig harða gagnrýni fyrir að hafa vitað af gagnalekanum síðan í byrjun desember án þess að láta lögreglu vita. Þess í stað var sett af stað rannsókn og rætt var við nokkur fórnarlömb gagnalekans.
Nú segir forstjóri BSI, Arne Schoenbohm, hins vegar að stofnunin hafi einungis vitað af fimm einstökum tilvikum gagnaleka en hafi ekki áttað sig á um að væri að ræða kerfisbundna netárás eða gagnaleka fyrr en síðastliðinn fimmtudag.
Þingmaðurinn Dietmar Bartsch sagði leyndarhyggju BSI vera „algjörlega óásættanlega“ og spurði hvort stofnunin hefði eitthvað að fela.
Persónuupplýsingum hundraða þýskra stjórnmálamanna var lekið á netið í seinasta mánuði í formi aðventudagatals. Meðal fórnarlamba er Angela Merkel, kanslari Þýskalands, og aðrir stjórnmálamenn. Þá var árásinni einnig beint gegn fjölmiðlamönnum og tónlistarfólki.
Enn er á huldu hver stóð á bak við gagnalekann, en upplýsingaöryggisráðuneyti Þýskalands rannsakar málið. Twitter-reikningnum sem birti upplýsingarnar hefur verið eytt en 17 þúsund manns fylgdu honum.
Innanríkisráðherra segir að engin sönnunargögn séu til staðar um að netöryggiskerfi ríkisstjórnarinnar eða þingsins hafi verið hakkað og ekki sé enn ljóst hvort það hafi verið gert eða hvort gagnalekinn komi frá innanbúðarmanneskju.