Var of hár fyrir endamarkið

Lundúnamaraþonið fór fram í dag, en þar var Keníamaðurinn Eliud Kipchoge fljótastur allra á nýju brautarmeti, 2:02:37. Brigid Kosgei, einnig frá Kenía, sigraði í kvennaflokki og varð yngsta kona sögunnar til þess að sigra hlaupið, á tímanum 2:18:20.

Þessi frábæru hlaupaafrek eru þó ekki það eina sem fólk ræðir um eftir maraþonið, því þar átti sér stað bráðfyndið atvik er einn hlauparanna kom í mark.

Sá ákvað að hlaupa í Big Ben-búningi, og þegar hann hafði hlaupið kílómetrana 42,2 í þessum eflaust óþægilega búningi, komst hann ekki yfir marklínuna þar sem hann var of hár.

Að lokum kom þó starfsmaður honum til hjálpar, eins og sjá má í myndskeiðinu hér að neðan.

Hér að neðan má svo sjá fleiri myndir frá Lundúnamaraþoninu í dag, sem ljósmyndarar AFP í Lundúnum tóku.