Eftirmynd Thunberg hengd fram af brú í Róm

Lögreglan í Róm á Ítalíu hefur hafið rannsókn vegna alvarlegra hótana, eftir að eftirmynd sænska aðgerðasinnans Gretu Thunberg var hengd fram af brú í borginni með snöru um hálsinn.

Þar blasti brúðan við vegfarendum í morgun, með tvær langar fléttur, og á hana var ritað „Greta er ykkar guð“ á enskri tungu.

Ítalskir stjórnmálamenn hafa fordæmt uppátækið. Virginia Raggi borgarstjóri Rómar sagði á Twitter-síðu sinni að Róm sýndi Thunberg-fjölskyldunni stuðning vegna málsins.

Nicola Zingaretti, leiðtogi ítalskra sósíaldemókrata hefur sömuleiðis fordæmt atvikið og kallar það „viðbjóðslegt ofbeldi“.

Greta Thunberg. Lögreglan í Róm á Ítalíu hefur hafið rannsokn á málinu, sem talið er fela í sér alvarlega hótun gagnvart sænsku unglingsstúlkunni. AFP

• 1 blogg um fréttina

Bloggað um fréttina

• Ásgrímur Hartmannsson: Ítalir líka