Púað og baulað, en einnig fagnað. Sitt sýndist hverjum þegar Donald Trump, forseti Bandaríkjanna, gekk í salinn í íþróttahöllinni í Madison Square Garden í gærkvöldi þar sem fram fór bardagi þeirra Kevin Lee og Gregor Gillespie í blönduðum bardagaíþróttum.
Forsetinn var í fylgd tveggja sona sinna, þeirra Eric og Donald yngri auk nokkurra leiðtoga í Repúblikanaflokknum, þeirra á meðal var Kevin McCarthy sem er leiðtogi Repúblikanaflokksins í fulltrúadeild Bandaríkjaþings. Trump veifaði mannfjöldanum og sló hnefa sínum í lófann. Skiptar skoðanir voru á nærveru forsetans, margir létu vanþóknun sína í ljós með því að púa á hann á meðan aðrir klöppuðu ákaft og þótti sér sómi sýndur með nærveru hans.
Þetta er í annað skiptið á nokkrum dögum sem Trump fær blendnar móttökur á íþróttaviðburði, en það fyrra var á á leik Washington Nationals og Houston Astros í lokaúrslitum atvinnumannadeildarinnar í hafnabolta síðastliðinn mánudag.
Nokkur fjöldi mótmælenda var fyrir utan íþróttahöllina í Madison Square Garden í gærkvöldi. Fólkið bar spjöld sem á stóð „Burt með Trump og Pence núna!“ og „Tökum hann haustaki“ en með því síðarnefnda er væntanlega verið að vísa til íþróttaviðburðarins sem stóð fyrir dyrum.