Hitinn þyngir heilbrigðiskerfum
Setja bókamerki
Hitabylgjan á norðurhveli jarðar hefur í för með sér aukið álag á heilbrigðiskerfi þeirra landa sem hún nær til en þeir sem veikir eru fyrir verða verst fyrir barðinu á hitanum. Frá þessu greinir Alþjóðaheilbrigðismálastofnunin WHO í dag og segir mikinn hita oft ýta undir einkenni eða kvilla sem fyrir eru.
Einkum hafa talsmenn WHO áhyggjur af hjartasjúkdómum, sykursýki og astma en milljónir íbúa þriggja heimsálfa hafa í dag mátt þola hitastig sem telst hættulegt heilsu margra.
„Gríðarlegur hiti tekur mestan toll af þeim sem síst þola, svo sem eldra fólki, ungbörnum, börnum, fátækum og heimilislausum,“ sagði Tedros Adhanom Ghebreyesus, forstöðumaður WHO, á blaðamannafundi í dag og bætti því við að ástandið skapaði mikið álag á heilbrigðiskerfið.
Komi sér upp neyðaráætlunum
WHO hefur, að sögn Ghebreyesus, ásamt Alþjóðaveðurfræðistofnuninni WMO unnið að því að þróa aðgerðaáætlanir sem ætlað er að draga úr neikvæðum áhrifum hitans háa á heilsu almennings.
Maria Neira, forstöðumaður lýðheilsu- og umhverfismála hjá WHO, kvað áhyggjur stofnunarinnar einkum hverfast um óléttar konur auk framangreindra hópa. Stjórnendur heilbrigðismála í hverju landi þyrftu að ná til þeirra sem væru í hættu og sjúkrahús að koma sér upp neyðaráætlunum.
Þá þyrfti að koma þeim boðum út til almennings að fólk stundaði ekki íþróttir yfir heitasta tíma dagsins heldur leitaði í svalari svæði innandyra, liti eftir þeim sem viðkvæmir væru og væri meðvitað um sólsting og örmögnun vegna hita.
Frá WMO bárust enn fremur þau varnaðarorð að hátt hitastig um nætur væri ekki síður varasamt þar sem mannslíkaminn fengi þá ekki færi á að jafna sig eftir hita dagsins.
Ók á ofsahraða á móti umferð og uppi á stétt
Laugavegur hjólaferðamannsins að fæðast
Bregðast við vopnahléstillögu á morgun
Tveggja mánaða flandur um Nýja-Sjáland
Breytingar á skipulagi fréttadeildar RÚV
Færri nota rafhlaupahjól eftir djammið
Fimm dauðir hvolpar fundust í poka
Þetta eru hjólaframkvæmdirnar sem unnið er að