Óttast um afdrif sex ára stúlku
Setja bókamerki
Ekkert hefur spurst til sex ára palestínskrar stúlku, Hind, og áhafnar sjúkrabíls sem send var út henni til bjargar í norðurhluta Gasa. Þegar síðast heyrðist frá henni var hún föst í bílflaki með látnum foreldrum sínum og systkinum.
Fimmtán ára systir hennar er talin hafa látist í miðju símtali þar sem hún grátbað um aðstoð frá Rauða hálfmánanum.
Fréttastofa katarska miðilsins Al Jazeera greinir frá þessu nú síðdegis og birtir upptöku af símtali systranna við hjálparsamtökin.
Í símanum í fleiri klukkustundir
Rauði hálfmáninn gerir ráð fyrir að öll fjölskylda stúlkunnar hafi látist. Stúlkan hafi í kjölfarið rætt við fulltrúa Rauða hálfmánans í fleiri klukkustundir þar sem hún var föst í bílflakinu.
„Hún sagði mér að myrkur væri að skella á, og að hún væri hrædd við myrkrið,“ hefur fréttastofan eftir Rönu Alfaqah, sem sér um að samhæfa viðbragð Rauða hálfmánans í Palestínu.
Hjálparsamtökin sendu út sjúkrabíl til að bjarga Hind, en allt samband við áhöfn sjúkrabílsins rofnaði.
Ættingjar stúlkunnar bíða enn og vona að hún finnist á lífi.
„Stafar heiminum hætta af þessari stúlku?“ spyr einn þeirra.
Skotin til bana með ömmubarnið við hlið sér
Nokkrir dagar eru síðan fjallað var um átján ára gamla palestínska konu, sem horfði upp á móður sína skotna til bana þar sem hún leiddi fjögurra ára gamlan dreng, ömmubarnið, sér við hlið á flótta undan vopnuðum átökum í al-Rimal-hverfinu í Gasaborg 12. nóvember.
Höfðu ísraelskir skriðdrekar ekið inn í hverfið nokkrum dögum áður, árásardrónar svifu yfir byggðinni og sprengjugnýrinn var ærandi.
„Móðir mín hefði orðið 58 ára 30. desember og hélt í hönd barnabarnsins síns. Hvers vegna að skjóta hana?“ spurði konan, Sara Khreis, í samtali við fréttamann CNN.
Sífellt meiri eyðilegging
Stríð Ísraels gegn hryðjuverkasamtökunum Hamas hefur skemmt eða eyðilagt um helming allra bygginga á Gasasvæðinu, að því er fram kemur í nýrri skýrslu Sameinuðu þjóðanna sem mbl.is fjallaði um fyrr í kvöld.
Samkvæmt útreikningum stofnunarinnar í lok nóvember höfðu 37.379 byggingar, eða 18% af heildarfjölda bygginga á Gasasvæðinu, verið ýmist skemmdar eða eyðilagðar í árásum Ísraelshers.
Síðan þá sýna gervihnattamyndir sífellt meiri eyðileggingu, að sögn Rami Alazzeh, hagfræðings við stofnunina sem sérhæfir sig í aðstoð við palestínska borgara, en hann er meðhöfundur skýrslunnar.
„Nýju gögnin sýna að 50% bygginga í Gasa eru skemmdar eða eyðilagðar,“ segir hann í samtali við AFP-fréttastofuna. Varar hann við því að þeim mun lengur sem hernaðaraðgerðir Ísraelshers í Gasa standi yfir, því verri verði afleiðingarnar.
„Gasa á þessari stundu er óbyggilegt.“
Þetta eru hjólaframkvæmdirnar sem unnið er að
Fimm dauðir hvolpar fundust í poka
Forsetinn líti yfir axlirnar á þingheimi
Ók á ofsahraða á móti umferð og uppi á stétt
Rothissa á vinnubrögðum forystu BÍ