Árásarmaðurinn sem beitti eiginmann Nancy Pelosi tilefnislausu og grófu ofbeldi var í dag dæmdur í 30 ára fangelsi.
Nancy Pelosi var forseti fulltrúadeildar bandaríska þingsins þegar árásin átti sér stað í október árið 2022. Hún var að heiman þegar árásarmaðurinn David DePape braust inn á heimili hennar í San Francisco.
Eiginmaður hennar Paul Pelosi var heima. Hann var 82 ára gamall og hafði ekki mikla burði til að verjast árásarmanninum.
Réðist hann á Paul Pelosi með hamri og lamdi hann meðal annars í höfuðið. Paul Pelosi hafði hins vegar tekist að gera lögreglu viðvart og kom hún á staðinn skömmu síðar og varð það honum mögulega til lífs.
David DePape var því handtekinn á staðnum og átti sér engar málsbætur. Árásin hafði hins vegar verið ætluð Nancy Pelosi sem hann taldi að væri heima. Annað kom á daginn.
Ákæruvaldið fór fram á 40 ára fangelsi en niðurstaðan varð 30 ára dómur.
David DePape neitaði ekki árásinni en í yfirheyrslum yfir honum kom í ljós að hann gat hugsað sér að ráðast á fleira þekkt fólk í Bandaríkjunum. Nefndi hann til að mynda Joe Biden Bandaríkjaforseta, ríkisstjórann í Kaliforníu Gavin Newsom og leikarann Tom Hanks.