Fornbókasala með nútímatækni

Í hugum flestra er fornbókasali gamall maður bakvið búðarborð með allt það í kollinum sem hann hefur á boðstólum. Kannski er það tímanna tákn að meira að segja þessi sérhæfða stétt kaupmanna hefur tekið tæknina í þjónustu sína, sem sannast á Braga Kristjónssyni, en hann hefur höndlað með gamlar bækur í þrjá áratugi. „Við erum nokkuð vel á veg komnir með netsíðuna bokin.is og það virðist ætla að skila sér í auknum áhuga hérlendis og erlendis,“ segir Bragi í viðtali við Tímarit Morgunblaðsins þar sem hann ræðir um líf sitt og starf.