Þórólfur Sveinsson, formaður Landssambands kúabænda, segir tillögu þingflokks Samfylkingarinnar um afnám tolla af innfluttum matvælum fyrir 1. júlí 2008 vera afar ótrúlega og að slíkt eigi sér ekki fordæmi í íslenskri atvinnusögu. Þær skýringar sem komu fram í hádegisfréttum Ríkisútvarpsins í dag hjá þingmanni Samfylkingarinnar í Norðvesturkjördæmi, Önnu Kristínu Gunnarsdóttur, sýni ótakmarkað hugmyndaflug.
Á vefsíðu Landssambands kúabænda er tilkynning frá Þórólfi þar sem þetta kemur fram. Þar bendir hann á ummæli Önnu um „góða reynslu Nýsjálendinga af því að fella niður stuðning við landbúnaðinn" en segir ekki hægt að líkja saman aðstæðum til landbúnaðar í Nýja-Sjálandi og Norðvesturkjördæmi. Það sýni „algjörlega ótakmarkað hugmyndaflug" sem geti haft „skelfilegar afleiðingar" fyrir þau 10.000 manns sem vinni við landbúnað og afleidd störf í Norðvestur- og Norðausturkjördæmum.
„Staðreyndin er sú að engin þjóð í heiminum sem býr við hliðstæðar aðstæður og Ísland hefur farið sömu leið og Nýsjálendingar. Sú staðreynd að samningar um landbúnaðarmálin á vettvangi WTO eru nú sigldir í strand, staðfestir að þær þjóðir heimsins sem þar takast á, eru ósammála því mati Önnu Kristínar Gunnarsdóttur að nýsjálenska leiðin sé þeim fær,“ segir Þórólfur.