Bill Gates á Bridshátíð eftir tvö ár?

Bill Gates, auðugasti maður heims, segist hafa áhuga á því að koma á Bridshátíð Icelandair á Íslandi eftir að hann sest í helgan stein eftir tvö ár. Hann lýsti áhuga sínum á því við Hjördísi Eyþórsdóttur þegar þau mættust á bridsmóti vestanhafs í september, en hún er eini atvinnumaður Íslendinga í brids.

Hjördís segir að Gates ætli sér að spila mun meira eftir að hann sest í helgan stein og að hann hafi sagt það líklegt að hann kæmi á Bridshátíðina eftir tvö ár.

Bill Gates og Warren Buffett eru í tveimur efstu sætunum yfir auðugustu menn heims samkvæmt Forbes-listanum og eru báðir forfallnir áhugamenn um brids. Buffett spilar nánast á hverju kvöldi á netinu og segir í nýlegu viðtali í USA Today að hann hafi spilað þar 4.800 spil í fyrra.

Og Gates hefur att kappi við fleiri Íslendinga en Hjördísi við spilaborðið, án þess að þeir hafi endilega haft hugmynd um það. Í ræðu sinni á leiðtogaráðstefnu í Edinborg í lok janúar nefndi Gates bridsleiki sína við Íslendinga á netinu sem dæmi um hve fjarlægðir hefðu styst með tilstyrk upplýsingatækninnar. Og í samtali við Ólaf Ragnar Grímsson, forseta Íslands, sagði hann greinilegt að Íslendingar væru öflugir bridsspilarar og að þeir hefðu sérstakan stíl.

Til upplýsingar fyrir þá fjölmörgu Íslendinga sem spila á netinu kemur fram í USA Today að Gates spilar undir nafninu „Chalengr“ og Buffett undir „T-Bone“.

Nánar er fjallað um brids í sunnudagsblaði Morgunblaðsins.

• 2 blogg um fréttina

Bloggað um fréttina

• Viggó H. Viggósson: Pípan til Bill Gates er alltof grönn
• Hákon Unnar Seljan Jóhannsson: Ágætt