Lögreglan í Borgarnesi lagði í nótt hald á um 45 grömm af fíkniefnum, mestmegnis kókaín, sem tvær 17 ára stúlkur höfðu falið innvortis í smokkum. Að sögn lögreglu voru stúlkurnar stöðvaðar um eittleytið í nótt við venjubundið eftirlit þar sem þær óku í norðurátt. Með þeim í för var karlmaður sem er um 10 árum eldri en þær.
Fólkið var flutt á lögreglustöðina í bænum þar sem grunur lék á að ökumaðurinn, þ.e. önnur stúlkan, væri undir áhrifum vímuefna. Í ljós kom að svo var.
Við læknisrannsókn kom jafnframt í ljós að stúlkurnar höfðu falið fíkniefnin í leggöngum.
Stúlkurnar og maðurinn voru yfirheyrð fram eftir nóttu en sleppt undir morgun. Málið telst upplýst.
Lögreglan gerði foreldrum stúlknanna viðvart sem og barnaverndaryfirvöldum þar sem þær eru undir lögaldri.