Þátttaka Íslands í friðargæslu í Darfur ekki líkleg

Eftir Atla Ísleifsson - atlii@bladid.net
Öryggisráð Sameinuðu þjóðanna hefur eftir margra mánaða karp samþykkt að senda fjölþjóðlegt friðargæslulið til hins stríðshrjáða Darfúr-héraðs í Súdan. Friðargæsluliðið verður það fjölmennasta í heimi þar sem um 26 þúsund friðargæsluliðar munu lúta sameiginlegri stjórn Sameinuðu þjóðanna og Afríkusambandsins. Ályktun öryggisráðsins gerir ráð fyrir að friðargæsluliðum verði heimilt að verja almenna borgara og hjálparstarfsmenn frá árásum með valdi, þó að fullveldi Súdans verði áfram virt. Að sögn Kristrúnar Heimisdóttur, aðstoðarmanns utanríkisráðherra, er nú til athugunar í ráðuneytinu hvort og þá með hvaða hætti Íslendingar geta lagt málinu lið.

Bjarni Benediktsson, formaður utanríkismálanefndar, segir að í fljótu bragði sýnist honum ekki líklegt að Íslendingar taki þátt í verkefninu með beinum hætti. „Slíkt þyrfti þá að eiga sér einhvern aðdraganda. Við höfum takmarkaðan mannauð og fjármuni til að sinna verkefnum af þessum toga og við höfum reynt að forgangsraða í þágu ákveðinna verkefna. Við erum auðvitað þátttakendur í Sameinuðu þjóðunum, en þátttaka í verkefni sem þessu myndi fela í sér ákveðna stefnubreytingu af okkar hálfu."

Bjarni segir íslensku friðargæsluna ekki vera þannig uppbyggða að hægt sé að bregðast skjótt við með mikinn mannafla og að um sé að ræða örfá störf hér og hvar um heiminn. „Það er þó auðvitað ráðuneytisins og friðargæslunnar að meta það á hverjum tíma hvar framlags okkar og þátttöku helst sé þörf."

Nánar er fjallað um þetta í Blaðinu í dag.