Viðræður SFR og ríkisins hafnar

Samninganefndir SFR – stéttarfélags og ríkisins funduðu í fyrsta sinn kl. 15 í gær í húsakynnum ríkissáttasemjara. Samninganefndir kynntu þar megin áhersluþætti í komandi viðræðum.

Fram kemur á heimasíðu SFR, að félagið leggi áherslu á að greidd séu sömu laun fyrir sambærileg störf hjá ríki og á almennum markaði, að kaupmáttur launa verði aukinn, að tekin séu næstu skref í jöfnun launa á milli kynja og að bættar verði aðstæður starfsmanna í vaktavinnu.

SFR segist hafa skilgreint einstaka áhersluþætti út frá þessum meginmarkmiðum, en þar sé lögð áhersla á að lágmarkslaun SFR félaga verði ekki undir 200.000 krónum á mánuði, að bættur verði réttur starfsmanna vegna veikinda og slysa, að sí- og endurmenntunarúrræði verði styrkt, að orlofsréttur verði bættur, ásamt fleiri áhersluatriðum.

Næsti samningafundur er boðaður mánudaginn 14. apríl.