Aðkoma fjárfesta að Reykjavík Energy Invest (REI) er eitt af því sem skoðað verður í stefnumótun fyrirtækisins til framtíðar, að því er kom fram í máli Kjartans Magnússonar, stjórnarformanns Orkuveitu Reykjavíkur og REI, á borgarstjórnarfundi í gær.

Kjartan sagðist ekki sjá fyrir sér að REI fengi fjármagn frá Orkuveitunni í framtíðinni og fyrirtækið myndi lágmarka áhættu í þeim verkefnum sem þegar væru komin í gang. Á meðan vinna við stefnumótun væri í gangi þyrfti hins vegar að standa vel að rekstri REI og halda áfram með verkefnin. Borgarfulltrúi Framsóknarflokks sagði útrásarstefnu meirihlutans af sama meiði og mörkuð var af fyrsta meirihluta þessa kjörtímabils – sem sprakk eftirminnilega þegar REI-málið stóð hvað hæst.

Óskar Bergsson, borgarfulltrúi Framsóknarflokks, bar það undir Vilhjálm Þ. Vilhjálmsson, oddvita sjálfstæðismanna í borginni, hvort Kjartan hefði haft umboð borgarstjórnarflokksins þegar hann undirritaði samkomulag milli REI og ríkisstjórnar Afríkuríkisins Djíbútís og vilyrði fyrir frekari viðræðum við orkufyrirtæki jemenska ríkisins nú nýverið. Vilhjálmur játti því að Kjartan hefði haft umboð „til að vinna að framgangi þessara mála en með lágmarksáhættu að leiðarljósi“. Hann hrósaði jafnframt stjórnarformanninum fyrir vel unnin störf.

Þetta taldi Óskar staðfesta að stefnubreyting hefði orðið í flokki sjálfstæðismanna. Þeir færu nú fremstir í flokki í að fylgja eftir stefnu sem ekki samræmdist hugsjónum þeirra fyrir rúmum fimm mánuðum. Og rökin væru þau, að minna fé yrði varið í áhættufjárfestingar og aðrir samstarfsaðilar kallaðir til.

Í hnotskurn

» Reykjavík Energy Invest er dótturfélag Orkuveitu Reykjavíkur, stofnað í júní á sl. ári.
»S tefnt var að því að REI yrði leiðandi á heimsvísu í fjárfestingum í jarðvarmavirkjunum.
» Sameina átti fyrirtækið Geysir Green Energy, en upplýsingagjöf var fyrir borð borin og REI-málið svonefnda varð úr.
» Á eigendafundi OR í febrúar var samþykkt að REI yrði í 100% eigu Orkuveitunnar.