Innlent | mbl | 3.6.2008 | 11:06

Brugðist við tilmælum Neytendasamtakanna

Kaupþing banki

Neytendasamtökin hafa, í kjölfar kvartana frá neytendum, ítrekað gagnrýnt aðferðir Kaupþings við sölu á Vista viðbótarlífeyrissparnaði. Fjölmörg dæmi eru um að ungt fólk hafi gert bindandi samninga í verslunarmiðstöðvum, á vinnustöðum og jafnvel á kaffihúsum, að því er segir á vef Neytendasamtakanna. Í kjölfar tilmæla frá samtökunum hefur Kaupþing bætt uppsagnarákvæði í lífeyrissamninga sína.

„ Fulltrúi Neytendasamtakanna átti fund með forvígismönnum Kaupþings þar sem þessi sölumennska var gagnrýnd. Neytendasamtökin lögðu til að Kaupþing setti í skilmála sína ákvæði um að rétthafi samnings gæti sagt upp samningnum innan 14 daga frá undirritun, enda myndi slíkt ákvæði í mörgum tilvikum koma í veg fyrir ágreining sem tengist samningsgerðinni. Fólk hefur þá einfaldlega ákveðið svigrúm til að hætta við.

Nú hefur Kaupþing fallist á þetta og bætt eftirfarandi við samningsskilmálana: „Undirritun rétthafa á samninginn skuldbindur hann ekki fyrr en fjórtán dögum frá gerð samningsins og er rétthafa heimilt að falla frá samningi innan þess frests.“

Jóhannes Gunnarsson, formaður Neytendasamtakanna, segir málið hafa verið í vinnslu í nokkurn tíma enda þurfi fjármálaeftirlitið að fara vandlega yfir allar breytingar á skilmálum. „Við erum mjög ánægð með þessar málalyktir og teljum að þessi breyting sé gott svar við þeim kvörtunum sem okkur bárust. Málinu hefur verið lokið farsællega.“