Sjóðurinn eignast fleiri íbúðir

Tilvikum hefur fjölgað þar sem Íbúðalánasjóður þarf að leysa til sín íbúðir sem leiguíbúðafyrirtæki hafa keypt eða byggt með láni frá sjóðnum og leigt til einstaklinga. Hefur sjóðurinn það sem af er ári leyst til sín fleiri eignir en allt árið í fyrra, eða 34 eignir nú en 32 allt árið 2007.

„Fyrir 2007 þekktist þetta varla,“ segir Ásta H. Bragadóttir, aðstoðarframkvæmdastjóri Íbúðalánasjóðs.

Í þessum tilvikum standa leigjendur frammi fyrir því að þurfa að rýma íbúðina mánuði eftir að sjóðurinn tilkynnir þeim bréflega hvernig mál standa, en oft býður sjóðurinn leigjendum íbúðirnar til kaups.

Ef um er að ræða margar íbúðir, t.d. heila blokk, hefur sjóðurinn þrjár leiðir. Fyrst af öllu leitar hann stundum til viðkomandi sveitarfélags með það í huga að selja sveitarfélaginu íbúðirnar, þá er stundum reynt að selja eignina í heild til leiguíbúðafélags og loks getur sjóðurinn auglýst sérhverja eign.

„Við vissum ekkert um erfiðleika fyrirtækisins fyrr en lögfræðihjörðin mætti inn á gólf til okkar,“ segir leigjandi á Flúðum, sem er í þeirri stöðu að Íbúðalánasjóður innleysti húsnæði það sem hann hefur á leigu. Þrjátíu dögum seinna barst honum bréf frá sjóðnum þar sem honum var kynnt staða mála og hann beðinn um að flytja út innan þrjátíu daga.