Fundu aura á Skildinganesi

Nú standa yfir endurbætur á gömlum hlöðnum sjóvarnargarði á Skildinganesi og að þeirri vinnu standa nokkrir af færustu steinhleðslumenn landsins. Þegar þeir voru nýlega að færa til grjót sjávarmegin við garðinn kom í ljós haugur af 5 og 10 eyringum. Allir voru aurarnir slegnir árið 1981.

Leifar af merkingum voru á vettvangi, sem bentu til þess að peningarnir hafi verið í upphaflegum umbúðum, þ.e. grænleitum léreftspokum.
Peningapokunum hafði verið komið fyrir undir stórum steini og þeir haldist þar að mestu óhreyfðir þangað til núna.

Að sögn Ómars Smára Ármannssonar, aðstoðaryfirlögregluþjóns, er myntin ekki lengur í gildi og verðmætið því lítið.  Lögreglan vilji þó gjarnan að þeir sem vita hvernig myntin komst undir stóra steininn við gamla sjóvarnargarðinn hafi samband og upplýsi fróðleiksþyrsta um málið.

„Það eina sem málið hefur skilað hingað til er að peningafundurinn er enn ein  staðfesting á tilvist örnefnisins „Skildinganes," sagði Ómar Smári  Ármannsson. 

Hluti af aurunum sem fundust á Skildinganesi.

• 1 blogg um fréttina

Bloggað um fréttina

• Valdimar Sigurjónsson: Líklegur eigandi fundinn!