Fangaklefi á Litla Hrauni. mbl.is/Brynjar Gauti

Það vakti óneitanlega mikla athygli þegar það kom í ljós að dánartilkynning, sem birtist á síðum Morgunblaðsins í gær, reyndist vera uppspuni frá rótum. Maðurinn, sem sagður var látinn, reyndist vera á lífi og afplánar dóm á Litla-Hrauni. Þetta var vinnustaðagrín sem gekk of langt, segir sá sem bjó til auglýsinguna.

„Þetta átti ekkert að fara neitt lengra,“ segir Sigurbjörn Adam Baldvinsson, sem einnig afplánar dóm á Litla Hrauni, í samtali við mbl.is. Það hafi verið mistök að tilkynningin birtist í Morgunblaðinu.

Hann vísar því alfarið á bug að þetta hafi verið tilraun til fjársvika. Í dánarauglýsingunni segir, að maðurinn hafi látist eftir langvarandi veikindi og var þeim sem vildu minnast hans bent á reikningsnúmer. Reikningurinn og kennitala, sem upp voru gefin, eru Sigurbjörns.

Hann segist aðspurður ekki hafa hugmynd um það hver sendi dánartilkynninguna til birtingar í blaðinu.

Lögreglan á Selfossi, sem hefur málið til rannsóknar, hefur tekið skýrslu af Sigurbirni og öðrum sem málið varðar. Nú er málið á borði lögreglustjórans og það er hans, eða fulltrúa hans, að ákveða með framhaldið, þ.e. hvort haldið verður lengra með málið eða það látið falla niður.

„Mér finnst að skýringarnar [hans eigin] ættu að vera teknar gildar,“ segir Sigurbjörn og bendir á enginn hafi lagt fé inn á reikningsnúmerið. Hann ítrekar að þetta hafi ekki verið tilraun til fjársvika. 

Spurður út aðgengi fanga að tölvum og að netinu segir Sigurbjörn: „Við höfum okkar tölvur en við höfum ekki sérstakan netaðgang.“ Fangarnir á Litla Hrauni geti t.d. ekki sent tölvupóst eða sms í gegnum netið. 

„Honum þótti þetta mjög fyndið,“ segir Sigurbjörn spurður út í þann sem grínið beindist að. Gamanið hafi hins vegar kárnað þegar dánartilkynningin birtist svo í blaðinu. Þeim hafi báðum brugðið „því þetta leit svolítið illa út. Þá var þetta hætt að vera fyndið,“ segir hann.

„Mér þykir þetta mjög leiðinlegt,“ segir Sigurbjörn að lokum.