Í tóbaksfylltu herbergi

„Það verður að hafa góða loftþéttingu,“ segir Ásgrímur Stefánsson, en hann er framleiðslustjóri einu tóbaksverksmiðju landsins. Hann mælir svo um framleiðslu neftóbaks, um hana gildi sömu lögmál og um verkun súrheys.

Þessi eina tóbaksverksmiðja á Íslandi er rekin í tveimur herbergjum í lágreistri byggingu á lóð Áfengis- og tóbaksverslunar ríkisins við Stuðlaháls í Reykjavík. Þar er neftóbak unnið eftir gamalli uppskrift.

Uppskrift og verkunaraðferð neftóbaksins hefur haldist nær óbreytt frá því framleiðslan hófst hér á landi. Hráefnið kemur til landsins malað í 200 kílóa kössum frá tóbaksfyrirtæki í Svíþjóð. Hrátóbakið er blandað með vatni, pottösku og salti í ákveðnum hlutföllum í gamalli hrærivél og eftir góða hræringu er blandan sett í eikartunnu. Lokað er vel yfir með plasti og síðan er eikarlokið spennt á áður en tunnurnar eru færðar til geymslu á lagernum.

Þar standa númeraðar tunnurnar í röðum í allt að átta mánuði á meðan þess er beðið að tóbakið verkist.