EES-samningurinn í húfi

Staða Íslands í Icesave deilunni var mjög þröng um miðjan nóvember. Var orðstír landsins verulega skaðaður og EES samningurinn í húfi, að því er kemur fram í minnisblaði, sem tekið var saman í utanríkisráðuneytinu og fréttastofa Ríkisútvarpsins sagði frá.

Á þessum tíma stóðu yfir viðræður við önnur ríki um ábyrgðir á Icesave reikningum  og einnig um aðstoð Alþjóðagjaldeyrissjóðsins.  Íslensk stjórnvöld héldu því fram að lagaleg óvissa ríkti um það hvort Ísland ætti að ábyrgjast lágmarksinnstæður á Icesave reikningum eða ekki. Engin önnur ríki tóku undir þennan málflutning og Ísland var einangrað í deilunni, samkvæmt minnisblaðinu, sem Ríkisútvarpið vitnaði til.

Þar segir, að trúverðugleiki landsins hafi beðið hnekki og á samráðsfundum í Brussel hefði komið skýrt fram að þolinmæði Evrópusambandsríkja gagnvart Íslandi væri nánast á þrotum. Útlit væri fyrir að fleiri ríki væru að bætast í hóp þeirra sem vildu sýna Íslandi fyllstu hörku, þar á meðal Þýskaland.

Þunginn í afstöðu ESB ríkja ykist með degi hverjum og  jafnvel helstu vinaþjóðir studdu ekki lengur Ísland, þar á meðal Norðurlandaþjóðirnar.

Þá hefðu sífellt fleiri kvartanir hefðu borist framkvæmdastjórn ESB vegna íslensku bankanna og ljóst var orðið að EES samningurinn var í húfi, næðust ekki samningar.

Þá segir utanríkisráðuneytið, að fölsk fréttatilkynning Seðlabankans um lánafyrirgreiðslu frá Rússum hefði skaðað trúverðugleika Íslands í Bandaríkjunum og á vettvangi NATO, þar sem ýmsar getgátur voru uppi um trúverðugleika Íslands sem bandamanns.

• 1 blogg um fréttina

Bloggað um fréttina

• Axel Jóhann Axelsson: Vinaþjóðir