Brá að heyra í syninum

„Sonur minn var annar mannanna um borð,“ segir nýi þingmaðurinn Ásbjörn Óttarsson, framkvæmdastjóri útgerðarinnar Nesvers frá Rifi á Snæfellsnesi. Syninum var bjargað ásamt öðrum um borð í Núp á sjöunda tímanum í morgun eftir að kviknaði í bátnum sem þeir voru á, Herdísi SH 145, upp úr klukkan fjögur í nótt.

Ásbjörn segir vont að missa annan bát útgerðarinnar. „En það er nú fyrir öllu að fá þá heila heim. Við horfum ekki í vélar og eignir í svona málum.“ Báturinn var tryggður. „Ég held að það sé nú ekki merkileg trygging enda skiptir það ekki nokkru máli.“

Ásbirni var brugðið þegar sonurinn tvítugur hringdi heim í nótt til að tilkynna um hrakfarirnar. „Þeir eru nú símalausir og allslausir enda brann allt.“ Mennirnir voru úti á dekki að skaka þegar eldurinn kom upp í lúkari sex tonna bátsins.

Þrátt fyrir ungan aldur, báðir um tvítugt, voru þeir vanir á sjó. Þeir hugðust róa frá Tálknafirði og höfðu farið einn túr þegar báturinn brann. Mennirnir eru í skýrslutöku hjá lögreglunni á Vestfjörðum, Patreksfirði. Búist er við að þær standi fram að hádegi.

Ásbjörn ætlar ekki að stöðva sjómennsku sonarins þrátt fyrir áfallið nú. „Nei, það ætla ég ekki að gera.“

Ásbjörn Óttarsson. mbl.is

• 1 blogg um fréttina

Bloggað um fréttina

• Halldór Jóhannsson: Skiljanlega...