Engir fundir til að ræða stöðu bæjarfulltrúans

„Það eru fleiri og fleiri sem hafa verulegar áhyggjur af þessu og eru ekki sáttir, en ég get ekki sagt að það hafi kristallast einhver ákveðin krafa í málinu,“ segir Gestur Valgarðsson, formaður Framsóknarfélagsins í Kópavogi, spurður um stöðu Ómars Stefánssonar bæjarfulltrúa flokksins. Ómar er stjórnarmaður í Lífeyrissjóði starfsmanna Kópavogs og er sem slíkur viðfangsefni rannsóknar Fjármálaeftirlitsins. Heimildir Morgunblaðsins herma að staða hans hafi veikst nokkuð vegna málsins en skoðanir flokksmanna á því séu þó ekki á einn veg.

Einar Kristján Jónsson, formaður fulltrúaráðs Framsóknarflokksins í Kópavogi, segir að ekki sé ráðgerður neinn fundur í ráðinu til að ræða stöðu Ómars. Ekki hafi komið fram krafa eða þrýstingur um það frá flokksmönnum, heldur sé það lagt í hendur Ómars sjálfs að ákveða hvort honum sé enn sætt í embætti.