Komið að endurskoðun á umgjörð fjármálakerfisins

„Það er alveg augljóst að við ætlum ekki að hafa sambærilega umgjörð um fjármálakerfið og var,“ segir Gylfi Magnússon viðskiptaráðherra, aðspurður hvort endurbætur á regluverki viðskiptalífsins sé hafin. „Það var eiginlega ekki hægt að vinna svona vinnu af miklu viti á meðan menn voru enn að slökkva elda og fá fast land undir fætur,“ segir Gylfi. Nú sé margt í bígerð.

Hann nefnir fjögur dæmi um atriði sem þarf að skoða. Í fyrsta lagi áhættuna sem innlendar fjármálastofnanir tóku með því að lána í erlendri mynt til innlendra aðila sem höfðu hvorki tekjur né eignir í þeirri mynt og höfðu því engar gengisvarnir. Þá nefnir hann reglur um lánveitingar til tengdra aðila, ekki síst eigenda fjármálafyrirtækja.

Í þriðja lagi nefnir Gylfi lán sem veitt eru eingöngu gegn veði í hlutabréfum. „Það þarf að skoða hvað er eðlilegt að gera og æskilegt til að þau fari ekki algerlega úr böndunum.“

Í fjórða lagi segir Gylfi að skoða þurfi hvernig launa- og hvatakerfi, m.a. kaupréttir, geti hvatt til of mikillar áhættu og hvernig tekið skuli á því. „Þar má hugsa sér ýmsar leiðir, einhverjar í gegnum skattkerfið en aðrar í gegnum regluverk fjármálamarkaðarins,“ segir hann. Ráðuneytið muni beita sér fyrir að svona lagað verði endurskoðað, í samvinnu við Seðlabanka Íslands, Fjármálaeftirlitið og fleiri. Þá verði fylgst vel með umræðu um þetta í nágrannalöndunum og ESB.