Allir sendiherrar erlendra ríkja á Íslandi verða upplýstir um stöðu Icesave-frumvarpsins í dag auk þess sem það verður kynnt fyrir fulltrúum Evrópusambandsins í Brussel á sama tíma.

Staðan kynnt

Össur Skarphéðinsson utanríkisráðherra segir að stjórnvöld hafi verið í reglulegu sambandi við Breta og Hollendinga um helgina vegna Icesave-frumvarpsins og hafi kynnt þeim breytingartillögur fjárlaganefndar og stöðu málsins daglega frá því síðdegis á föstudag. „Það hefur verið farið ýtarlega yfir öll þessi mál með þeim og þeim hefur verið send nákvæm þýðing,“ segir Össur. Hann bætir við að þeim hafi jafnframt verið gerð grein fyrir því að enn sé 2. og 3. umræða um málið eftir á Alþingi og framhaldið sé þar af leiðandi í höndum þingsins.

Frumvarpið getur tekið breytingum í meðförum þingsins og segir Össur að viðsemjendum hafi verið gerð grein fyrir því. Hann segir mikilvægt að halda Evrópusambandsþjóðum og sérstaklega Frökkum og Þjóðverjum upplýstum um málið og því verði það kynnt þeim í dag. Hann vill ekki tjá sig um fyrstu viðbrögð Breta og Hollendinga en segir að afstaða þeirra kunni að breytast eftir því sem þeir skoði málið betur. „Ég treysti mér sjálfur til þess að rökstyðja það með sannfærandi rökum að þessar breytingartillögur fjárlaganefndarinnar rúmist innan ramma samningsins en ég dreg enga dul á það að það getur orðið nokkur torfæra að sannfæra menn handan landsteina um það.“

Steingrímur J. Sigfússon fjármálaráðherra áréttar að Bretum og Hollendingum verði áfram haldið upplýstum. „Ég vona að þeir verði skilningsríkir,“ segir hann.

Guðbjartur Hannesson, þingmaður Samfylkingarinnar og formaður fjárlaganefndar, segir enn mikla vinnu eftir.