Tvær vefsíður uppfylltu skilyrði laga um sölu á raftækjum

Tvær  íslenskar vefsíður uppfylltu skilyrði laga um sölu á raftækjum á Netinu, skv. könnun Evrópusambandsins sem gerð var víða í álfunni og Neytendastofa sá um að framkvæmda hér á landi. Þetta eru vefsíður Elko og Nýherja.  Alls tóku 26 aðildarríki ESB, auk Noregs og Íslands, þátt í athuguninni sem tók til 369 vefsíðna.

Neytendastofa tekur þátt í samvinnu stjórnvalda á Evrópska efnahagssvæðinu um neytendavernd og er einn þátturinn í samstarfinu samræmdar aðgerðir á ýmsum afmörkuðum sviðum viðskiptalífsins. Stjórnvöld í þeim ríkjum sem taka þátt í aðgerðunum kanna þá samtímis og með sama hætti í öllum ríkjunum hvort réttindi neytenda séu virt. Í kjölfarið kanna stjórnvöld nánar þau fyrirtæki sem mögulega brjóta gegn lögum og reglum og grípa til aðgerða ef um brot er að ræða.

Í maí var gerð athugun á vefsíðum sem bjóða til sölu raftæki ætluð neytendum, þ.e. stafrænar myndavélar, farsíma, tónlistarspilara, DVD spilara, tölvubúnað og leikjatölvur.

Kannað var hvort vefsíður væru í samræmi við neytendalög að því er varðar upplýsingar um seljanda, vöruna, þ.e. heildarverð og lýsing á vöru og réttindi neytenda.

 Niðurstöður aðgerðarinnar eru kynntar í dag af framkvæmdastjóra neytendamála hjá Evrópusambandinu, skv. upplýsingum frá Neytendastofu. Í ljós kemur að hjá 55% af þeim 369 vefsíðum voru upplýsingar ófullnægjandi. Algengustu misbrestirnir voru villandi upplýsingar um réttindi neytenda, villandi upplýsingar um heildarverð og ófullnægjandi eða engar upplýsingar um seljanda. 

Athugun Neytendastofu tók til tíu íslenskra vefsíðna þar sem raftæki eru á boðstólum. Kannað var hvort vefsíðurnar væru í samræmi við ákvæði laga um óréttmæta viðskiptahætti, laga um rafræn viðskipti og aðra rafræna þjónustu og laga um húsgöngu- og fjarsölusamninga. Öll þessi lög byggja á sameiginlegum reglum Evrópska efnahagssvæðisins.

Tvær af þeim vefsíðum sem Neytendastofa kannaði uppfylltu skilyrði framangreindra laga varðandi sölu á raftækjum á Netinu en það voru vefsíður Elko, www.elko.is og Nýherja, www.netverslun.is.

Aðrar vefsíður sem Neytendastofa kannaði þarfnast nánari athugunar, en það eru bodeind.is, computer.is, ejs.is, fartolvur.is, siminn.is, start.is, tolvuvirkni.is og vodafone.is. 

Neytendastofa hefur haft samband við framangreinda aðila og óskað eftir nánari upplýsingum og skýringum og að lagfæringar verði gerðar á vefsíðum þar sem þess er þörf.

www.neytendastofa.is