Tinna áfram Þjóðleikhússtjóri

Menntamálaráðherra hefur skipað Tinnu Gunnlaugsdóttur þjóðleikhússtjóra til næstu fimm ára, frá og með 1. janúar 2010. Tinna hefur gegnt stöðu þjóðleikhússtjóra frá árinu 2004. Við ákvörðunina var bæði tekið tillit til álits þjóðleikhúsráðs og viðtala við umsækjendur, að því er segir í tilkynningu frá menntamálaráðuneytinu.

Kolbrún einnig metin hæfust

„Við skipun Tinnu Gunnlaugsdóttur er litið til framtíðarsýnar hennar og reynslu af stjórnun og daglegum rekstri. Þegar horft var sérstaklega til framtíðarsýnar umsækjenda í ljósi fyrirsjáanlegs niðurskurðar voru hugmyndir Tinnu mjög vel mótaðar. Rekstur Þjóðleikhússins hefur á síðustu misserum verið aðlagaður mjög að fjárlagaramma og eftirlit og áætlanagerð verið efld," að því er segir í tilkynningu.

Álit þjóðleikhúsráðs var birt ráðherra 17. ágúst sl. Í álitinu kom fram að allir umsækjendur væru hæfir en tveir umsækjendur, Tinna Gunnlaugsdóttir og Þórhildur Þorleifsdóttir, væru mjög vel hæfir. Eftir viðtöl þriggja starfsmanna menntamálaráðuneytisins undir stjórn sérfræðings í mannauðsstjórnun voru þrjár metnar hæfastar: Kolbrún Halldórsdóttir, Tinna Gunnlaugsdóttir og Þórhildur Þorleifsdóttir.