Gylfi Magnússon á blaðamannafundi síðdegis. mbl.is/Golli

Framkvæmdastjórn Alþjóðagjaldeyrissjóðsins hefur lokið umfjöllun um efnahagsáætlun Íslendinga á fundi í dag. Með því veitir stjórnin heimild til þess að afgreiða næsta hluta af lánasamningi sjóðsins til Íslands að fjárhæð 167,5 milljónir dala, jafnvirði 21 milljarðs króna.

Í tilkynningu frá efnahags- og viðskiptaráðuneytinu segir, að auk þess sé að vænta viðbótarlána frá Norðurlandaþjóðunum að fjárhæð 625 milljóna dala, 78 millljarða króna, í kjölfar þessarar samþykktar sjóðsins.

„Við fögnum þessum áfanga sem viðurkenning á þeim árangri sem náðst hefur í efnahagsmálum og við endurreisn fjármálakerfisins á undanförnum mánuðum. Gera má ráð fyrir því að traust alþjóðlegra fjármálamarkaða aukist í kjölfarið þar sem Íslendingar hafa staðið við öll meginmarkmið efnahagsáætlunarinnar og njóta til þess fulls stuðnings AGS og vinaþjóða," sagði Gylfi Magnússon efnahags- og viðskiptaráðherra, í tilkynningunni.

Næsta endurskoðun efnahagsáætlunarinnar er nú áformuð eftir miðjan desember á þessu ári. Vegna þeirra tafa sem orðið hafa á endurskoðun áætlunarinnar hefur samstarf AGS og Íslendinga verið framlengt til maí 2011 frá nóvember 2010 eins og gert var ráð fyrir í upprunalegu samkomulagi.

Við hverja endurskoðun senda íslensk stjórnvöld sjóðnum uppfærða viljayfirlýsingu. Í yfirlýsingu íslenskra stjórnvalda til stjórnar sjóðsins er þess getið að meginmarkmið efnahagsáætlunarinnar séu að tryggja stöðugleika krónunnar, endurreisa fjármálakerfið og tryggja sjálfbærni í opinberum fjármálum á næstu misserum. Unnið hafi verið ötullega að þessum markmiðum en óska þurfi undanþágu í nokkrum liðum þar sem ekki hafi verið unnt að ná tilsettum markmiðum fyrir þann tíma sem tilgreindur var í upprunalegri áætlun. Stjórn sjóðsins féllst á að veita undanþágu frá ákvæðum um hreinan fjármagnsjöfnuð ríkissjóðs, hreinan gjaldeyrisforða Seðlabankans og endurfjármögnun viðskiptabankanna auk þess sem tillit er tekið til aðstæðna varðandi áframhaldandi framkvæmd gjaldeyrishafta.