Ætluðu að hefja leit að Dorrit

Lögreglan í Mumbai á Indlandi var í þann mund að hefja leit að Dorrit Moussaieff, eiginkonu Ólafs Ragnars Grímssonar, forseta Íslands, á mánudag þegar hún „hvarf“ af hótelinu þar sem þau hjón dvöldu.

„Við vorum í þann mund að hefja leit að eiginkonu forsetans þegar hún kom gangandi inn í hótelið með innkaupapoka,“ hefur indversk fréttastofa eftir háttsettum lögreglumanni í borginni.

Hann segir, að Dorrit hafi skroppið í búðir og farið í heilsurækt. 

Dorrit og Ólafur Ragnar dvöldu í Mumbai á leið sinni í opinbera heimsókn til Indlands. Dorrit kom til borgarinnar fyrr um daginn en Ólafur Ragnar kom þangað síðdegis. 

Lögreglan segir, að 25 manna lögreglulið hafi átt að gæta Dorrit á meðan hún dvaldi á Trident hótelinu í Mumbai. Fleiri voru kallaðir út eftir að Dorrit hvarf. Hún vildi hins vegar ekki svona mikla gæslu og því fóru aðeins örfáir með henni í verslunarferðina. Það láðist hins vegar að láta aðra vita af ferðum forsetafrúarinnar.

• 4 blogg um fréttina

Bloggað um fréttina

• Ómar Ragnarsson: Jón eða séra Jón, forseti eða ekki forseti.
• Ingvi Rúnar Einarsson: Hefja leit af Dorrit.
• Stefán Friðrik Stefánsson: Leitin að Dorrit
• Velvakandi: Íslenski hátturinn