Össur ræddi við Moratinos

Össur Skarphéðinsson utanríkisráðherra átti í gærkvöldi fund með Miguel Ángel Moratinos, utanríkisráðherra Spánar en hann gegnir nú formennsku í ráðherraráði Evrópusambandsins. Fundurinn fór fram í utanríkisráðuneytinu í Madrid.

Samkvæmt upplýsingum frá utanríkisráðuneytinu útskýrði Össur stöðuna í Icesave-málinu og það samráð sem átt hefði sér stað meðal stjórnmálaflokkanna á Íslandi og samskipti við ráðamenn í Bretlandi og Hollandi.

Þá ræddi Össur um efnahagsáætlun Íslands og Alþjóðagjaldeyrissjóðsins og hvatti til þess að Evrópusambandsríki styddu endurskoðun áætlunarinnar á réttum tíma. Nauðsynlegt væri að vinveittar þjóðir sýndu Íslandi stuðning í verki á þessum tímum.

Ráðherrarnir ræddu umsókn Íslands að Evrópusambandinu en fyrirhugað er að framkvæmdastjórn sambandsins afgreiði skýrslu sína um Ísland síðar í þessum mánuði. Ítrekaði Moratinos fyrri ummæli um að Evrópusambandið liti svo á að umsókn Íslands og Icesave-málið væru tvö aðskilin mál sem ekki ætti að tengja saman.

• 2 blogg um fréttina

Bloggað um fréttina

• Axel Jóhann Axelsson: Á réttum tíma í Janúar síðast liðnum?
• Ómar Geirsson: Spænskur heiðursmaður fullyrðir að ICEsave hafi ekkert með ESB aðild …