Segir að rætt hafi verið um skötuselinn
Skötuselur
Vilhjálmur Egilsson, framkvæmdastjóri Samtaka atvinnulífsins, sagði í Kastljósi Sjónvarpsins í kvöld að skötuselurinn hafi komið fram við endurskoðun stöðugleikasáttmálans í október. Forsvarsmenn ríkisstjórnarinnar hafi lofað því að ekki yrði hróflað við skötuselnum.
Samtök atvinnulífsins segja það ófrávíkjanlega kröfu, að svonefnd skötuselslög, sem samþykkt voru á Alþingi í gær, verði dregin til baka. Samtökin segjast líta svo á, að ríkisstjórnin hafi með þessari lagasetningu slitið stöðugleikasáttmálanum, sem gerður var í fyrra.
Sagði Vilhjálmur á blaðamannafundi íd ag að skötuselsmálið snérist um tvö grundvallarmál. Í fyrsta lagi hefði Alþingi allt í einu veitt heimild til að ofveiða eina fiskitegund 80% umfram ráðgjöf Hafrannsóknastofnunar en SA væru fylgjandi því að farið verði að ráðgjöf fiskifræðinga.
Í öðru lagi væri með lögunum verið að gera grundvallarbreytingar á kvótakerfinu, sem fælust í því að selja ætti fiskveiðikvótann en lögin gera ráð fyrir því að viðbótarkvóta í skötusel verði úthlutað gegn gjaldi. Sagði Vilhjálmur, að útgerðir hefðu tekið á sig kvótaskerðingu þegar illa gekk en ættu ekki samkvæmt þessu ekki að njóta þess þegar betur áraði.
Stöðugleikasáttmálinn snýst ekki um skötusel eða kvótakerfið yfirleitt, segir í yfirlýsingu frá ríkisstjórninni í dag.
„Stöðugleikasáttmálinn er formlegur samráðsvettvangur ríkisstjórnar Íslands, Sambands íslenskra sveitarfélaga, Alþýðusambands Íslands, Bandalags háskólamanna, BSRB, Kennarasambands Íslands, Samtaka starfsmanna fjármálafyrirtækja, Bændasamtaka Íslands og Samtaka atvinnulífsins um margvísleg brýn samfélagsmál og efnahagslega endurreins Íslands. Allir ábyrgir aðilar hljóta að koma að því mikilvæga samstarfi hvað sem öðrum óskyldum ágreiningsmálum líður.
Ríkisstjórnin hvetur Samtök atvinnulífsins til áframhaldandi samstarfs á grundvelli stöðugleikasáttmálans og lýsir því yfir að hér eftir sem hingað til er ríkisstjórnin reiðubúin til samstarfs og sátta um einstök mál. Hvað sem afstöðu Samtaka atvinnulífsins líður mun áfram verða unnið að endurreisn efnahagslífisns á grundvelli stöðuleikasáttmálans enda miðar vel í þeim verkefnum sem þar er unnið að," segir í yfirlýsingu frá ríkisstjórninni.
